نهر الحب

بنات كتير اتربت علي حب الأفلام الأبيض والأسود، خصوصا الرومانسي منها. أغلبها كانت قصة إحسان عبد القدوس وأشهرها اللي كان بطولة فاتن حمامة وعمر الشريف. أنا كنت من محبي فيلم نهر الحب. كنت بتفرج عليه كتير جدا.

الفيلم ده، للناس اللي ماشفتهوش، بطولة فاتن حمامة وعمر الشريف وزكي رستم. مقتبس من القصة الإنجليزية "أنا كارنينا".

بتدور أحداث الفيلم ده إن البطلة (نوال) بتكون عايشة في ضاحية مع أخوها المحاسب اللي بيشتغل عند طاهر باشا (زكي رستم). أخو نوال بيختلس مبلغ والباشا بيهدده وبيبتزه. نوال بتقرر إنها تتجوز الباشا برغم فرق السن الكبير عشان تخلص أخوها من الورطة دي.

بنشوف إن الباشا رجل بارد المشاعر، بيتجاهل زوجته أغلب الوقت، دايما مشغول في شغله ومش مهتم بزوجته، لا يتواني عن إنه يعلمها دروس ويقوم من أخلاقياتها وسلوكها. نوال بتتعرف علي نور الشريف وبتنشأ بينهم قصة حب. وأنا صغيرة كنت طبعا بتعاطف معاها جدا وكان بيبقى نفسي يتجوزوا وتتوج قصة حبهم. لما كبرت وبقيت أتفرج عالفيلم ده وأنا ناضجة. اكتشفت إن الفيلم ده بيرسخ أفظع المبادئ ألا وهي الخيانة. اتفرجت عالفيلم من قريب، مافهمتش ليه نوال كرهت الباشا، الراجل كان تربوي جدا، محترم، مخلص، همه كله الشغل، بيساعد أخوها وبيحاول أغلب الوقت إنه يحسن منها حتي لو بطريقة مش عجباها. هل فعلا الزوج اللي زي طاهر باشا ممكن يتخان؟ ليه اتعاطفنا مع واحدة ناكرة للجميل، واحدة خانت العشرة، ومهمهاش ابنها ولا مستقبله ولا سمعتها ولا سمعة جوزها. هل ممكن نبرر الخيانة في ظروف معينة؟ أنا عارفة إن القصة دي مش واقعية، بس في مجتمعنا دلوقتي ظاهرة الخيانة طفت عالسطح بصورة مرعبة.

هل هييجي علينا وقت ونبرر الخيانة؟ هل هنبتدي نتفهم موقف الست اللي ممكن تخون جوزها؟

معظم الستات اتعاطفت مع نوال عشان طاهر باشا كان من وجهة نظرهم بيسيء معاملتها، وجه عمر الشريف حسسها بحاجات افتقدتها في علاقتها الزوجية. 

التساؤل ده بيراودني أوقات كتير. في مجتمعنا للأسف ناس كتير بقت بتشوف إن الراجل اللي متعدد العلاقات وهو متجوز، شيء مسلم بيه، وإن الست اللي جوزها مخلص ده عملة نادرة. بنسمع عن ستات كتير عارفين إن أزواجهم بيخونوهم وساكتين وراضيين بالأمر الواقع. وشايفين إن أحسن ما يتجوز عليها يروح يعرف واحدة واتنين عليها. لو سمعنا إن واحدة بتخون جوزها هل مجتمعنا هيرحمها؟ هل هيلتمسلها أعذار؟ هل هيحاول يتفهم موقفها؟ولا هيرفضها ويقمعها؟ طب ولو بصينا للست اللي بتخون جوزها علي إنها جرثومة، لا تستحق الحياة، كنا بنعيط ليه في فيلم نهر الحب وكان نفسنا طاهر باشا يموت ولا يحصله أي حاجة عشان نوال تتجوز عمر الشريف؟

الموضوع ده شائك وبصفة شخصية أنا مش عارفة موقفي هيكون إيه لو عرفت إن واحدة بتخون جوزها!