English

    Fustany on Instagram Fustany on Facebook
    تابعي موقع فستاني للموضة والجمال
من فضلك قم باغلاق مانع الاعلانات لكى تستطيع مشاهدة محتوى الموقع كاملا
لايف ستايل Header image amr badawy couch traveler main image fustany ar

| بقلم عمرو بدوي

أرخص وأجدد طريقة للشحن والتسوق أونلاين

عايزين حاجات من بلاد بره! كام مرة شوفنا حد بيسأل السؤال ده على الفيسبوك ولا تويتر ولا واتساب:

محدش جاي من أمريكا قريب؟

مين جاي الشهر الجاي من دبي؟

في حد مسافر ألمانيا في شهر مايو؟

في حاجات كثير جدا بيكون نفسنا نبعتها أو نجيبها أو نشتريها من بره علشان أسباب كثيرة. عايزين نبعت هدية أو ورق مهم؟ بننتظر حد يكون "رايح بلاد بره" ياخدها معاه.

وأحيانا أكثر بنكون عايزين نشتري حاجة من برة سعرها أرخص بسبب الجمارك والضرائب والشحن والتفريغ وكل الحاجات دي. بننتظر حد "جاي من بلاد بره" علشان يجيب لنا موبايل، ساعة، عدسة كاميرا، دواء أو مكياج حتى.

أنا شخصيا كنت أول ما أعرف أن في حد من صحابي ولا قرايبي جاي من أمريكا عينيا تلمع كدة ويجيلي شعور بالفرحة العارمة. عايز أيه من أمريكا أنا طيب؟ مش عارف الصراحة، هدخل أتفرج على أمازون وأكيد أكيد في حاجة حلوة أونلاين عندهم ورخيصة ومش موجودة هنا أو العكس أحيانا. أول ما نعرف أن في حد مسافر من مصر رايح أمريكا، نحاول نبعت معاه حاجات علشان أخويا اللي عايش هناك. أحيانا بتكون علبة حلويات شرقية فقط علشان عارفين قد أيه هو بيحبها.

طيب اللي معندوش صحاب وقرايب بيسافروا كتير، يعمل ايه؟

الحل الوحيد لو ما تعرفش حد وعايز حاجة ضرورية، هو إنك تستخدم خدمة شحن زي DHL ولا Aramex ولا FedEx علشان تجيب الحاجة دي. "بس أنا مستعجل ومش عايز أدفع مصاريف شحن ولا جمارك مفيش حل ثالث؟"

خدمة جديدة

مجموعة من الشباب المصريين كانوا دائما بيعانوا من المشكلة دي وقرروا يعملوا موقع أونلاين وتطبيق على الموبايل يخليك تتعرف على ناس مسافرة "رايحة بلاد بره أو جاية من بلاد بره" وعندها استعداد توديلك أو تجيبلك الحاجة اللي أنت عايزها لحد البلد اللي أنت عايزها. إزاي ده؟

الموقع الجديد اسمه hitchhiker.io– والتطبيق بتاعه متوفر على apple store للتليفونات الآيفون وكمان متوفر على google play للتليفونات الأندرويد. الفكرة ببساطة إن كل حد ممكن يشترك على الموقع ده بصفته الراسل أو المسافر:

الطرف الأول "الراسل/الشاحن/Shipper" اللي عايزين يرسلوا أو يشحنوا حاجات بين أي مدينتين في العالم.

الطرف التاني "المسافر/Traveler" المسافرين اللي معاهم مكان متاح وممكن ياخدوا معاهم حاجات.

والمقابل ايه؟

طبعا هيكون في تكلفة مادية للخدمة دي هيدفعها الراسل للمسافر -واللي هتكون بالتأكيد أوفر وأسرع بكتييير من خدمات الشحن التقليدية.

معايير الآمان والسلامة

طبعا أي حد هيكون مستغرب جدا إنه ازاي يستأمن حد ما يعرفوش على حاجة غالية هيبعتها. طبعا كلها مخاوف مشروعة والحلول بتاعتها كانت على رأس أولويات الشركة القائمة على المشروع.

١- بيتم التأكد من هوية جميع المشتركين على الموقع/التطبيق عن طريق الاثباتات الشخصية الحكومية -رقم التليفون والإيميل الحسابات البنكية- وحتى الفيسبوك كمان.

٢- أي طرد هيتم نقله من خلال التطبيق هيكون متأمن عليه بحد أقصى ١٠٠٠ دولار.

٣- طبعا طبعا طبعا، الطرف المسافر ليه الحق في فحص أي طرد هيقوم بنقله من مكان لمكان و قبوله أو رفضه.

إيه الخطوات بالظبط اللي هتربط الحاجات دي كلها سوا؟

١- لو أنت الراسل: هتنزل على التطبيق بوست خاص بالحاجة اللي عايز تبعتها أو تجيبها وكل المعلومات عنها.

أما لو أنت المسافر: هتنزل على التطبيق وجهة سفرك ومواعيدها.

٢- لو أنت الراسل: هتتواصل مع مسافرين على الموقع مسافرين البلد اللي أنت عايزها -ولو مفيش حد في الوقت الحالي، هتنتظر إشعار من الموقع لو حد مسافر الوجهة بتاعتك.

أما لو أنت المسافر: هتتواصل مع الراسلين اللي حاطين إعلانات عايزين خدمة توصيل للبلد اللي أنت مسافرها.

٣- لما بيحصل تواصل بين أي اتنين من الطرفين، كل واحد بيشوف البروفايل بتاع التاني ولو مناسبين لبعض بيحصل توافق بينهم وينتقلوا لمرحلة التفاوض المباشر.

مرحلة التفاوض

بيتم التواصل بين الطرفين مباشرة للتحدث في التفاصيل المهمة بالبضاعة وميعاد التسليم... بيتم فتح chat box بين الطرفين لمناقشة ٣ حاجات أساسية: مكان الاستلام - تكلفة الخدمة - مكان التسليم.

- هتتفقوا على مكان وميعاد "التسليم". ممكن الراسل يقابل المسافر بنفسه يديله الحاجة اللي عايز يبعتها أو ممكن يتم شحنها على عنوان المسافر من على أي موقع تسوق زي Amazon/eBay مثلا.

- لو أنت المسافر، طبعا أول حاجة هتيجي في بالك وأنت مسافر - يمكن باعتين معايا مخدرات مثلا؟ طبعا طبعا طبعا أول حاجة تعملها لما تستلم الطرد إنك تفحصه بنفسك قدام الراسل وليك كامل الحق إنك تقبله أو ترفضه.

- هتتناقشوا كمان في تكلفة توصيل الشحنة. يعني لو حاجة صغيرة وخفيفة ولا حاجة كبيرة وتقيلة. لو محتاجين reference point علشان تحسبوا التكلفة إزاي، ممكن تستخدموا مواقع الشحن مثلا اللي بتشحن حول العالم. معظم المواقع دي بتحط خدمة "تقدير مصاريف الشحن". احسبوها وخلوا تكلفة الخدمة ٥٠٪ مثلا من الرقم ده أو لو الحاجة اللي هتوصلها فرق سعرها كبير بين البلدين، ممكن مصاريف الشحن تكون ٥٠٪ مثلا من فرق السعر بين البلدين. الموضوع تفاوضي بين الطرفين بدون أدنى تدخل من القائمين على التطبيق.

- هتتفقوا كمان على مكان توصيل الطرد في البلد اللي مسافرها.

الدفع عند التوصيل

بعد ما الطرفين يوصلوا لاتفاق بخصوص كل التفاصيل والمصاريف، بيعملوا تحديث على التطبيق إن تم الاتفاق بينكم وبتكتبوا السعر اللي تم الاتفاق عليه. بيتم خصم المبلغ كاملا من الراسل وبيتم تحويله للمسافر بعد توصيل الطرد لوجهة سفره.

التسوق أونلاين Online Shopping

أهم حاجة في نظري في التطبيق ده هي توفير الشوبينج أونلاين بأسعار تنافسية جدا. خصوصا ما خف حمله وغلا ثمنه. لو أنت عايز تشتري حاجة من أمريكا مثلا وتشحنها مع حد نازل مصر، ممكن بكل بساطة تتواصل مع أحد المسافرين اللي أعلنوا إنهم جايين من أمريكا إلى مصر، والاتفاق معه على تفاصيل الطرد وسعر الخدمة. بعدها اعمل الطلب أونلاين على موقع للتسوق واشحنه مباشرة إلى عنوان المسافر علشان يجيبها معاه وهو جاي. بسيطة ومفيدة ومربحة للطرفين.






تصنيفات سفر  ميزانية السفر  نصائح  نصائح عامة  التسوق  تسوق عبر الإنترنت